Nyoe neudeungoe , Hadis nabi ulon peugah
Bak si uroe, u blang Nabi Neumeulangkah
Na sikeujap, sinan teutap pang ulee Nabi
Deuh neukalon, saboeh kawoem biek yahudi
Di yahudi, jipeureugi masuk hutan
Jithuen taroen, Nabi kalon preh disinan
Antara taroen, deungan Nabi hana ji oh
Gluh lam utuen, keunan jiplueng lan taroen roh
Jimeulawan keudeh keunoe, ka han lhueh le
Sira jimoe, jingadu droe ubak Nabi
Ya Habibi, Ya Maulana, Ya Muhammad
Gaseh sayang, lon binatang ka meukumat
Neupeulhueh lon, ya Habibi siat lon woe
Sayang raya, anuek dua banceh baroe
Rijang keunoe, e pang ule lon keumbali
Sayang raya, anuek dua mom lon jak bri
Meunyoe ubah, janji ulon bukon bacut
Miseu umat tan ibadat, ngoen seulawuet
Neulake lon ya pang ulee, bak yahudi
Droe neuh lake, kameuteunte meuhat jibri
Yoehnyan Nabi, teuka insueh dalam hate
Neujak laju, bak yahudi neupeurab le
Hai yahudi beutaturi, lon Muhammad
Gluh lan taroen, peulhueh rijang jiwoe siat
Dum yahudi, seukalian jimeupakat
Gluh tapeulhueh, taci ujoe si Muhammad
Meunyoe beutoi, binatang kluet keunoe jiriwang
Tanyoe bandum , bak uroenyoe ta iseulam
Suot sidroe, dalam kawan bukon meunan
Jilon sidroe, binatang nyoe, bahle meunan
Padum na hek, dalam utuen pijroek binoe
Ohban karoeh, tajak peulhueh padum rugoe
Glueh jipeulhueh, nibak taroen le yahudi
Laju jiwoe, lake izin nibak nabi
Glueh jipeulhueh, rijang rijang laju jiwoe
Troek bak anuek, meusoek meusoek sira jimoe
Wahe e anuek tangke hate dua sikarang
Tabeudoeh laju jak mom susu rijang rijang
Di ma kadang jadeh mate bak uroenyoe
Ma meujanji deungan nabi sideh bunoe
Bak ma jak jak dalam utuen mita raseuki
Hana mak ngieng taroen jithuen le yahudi
Untoeng na Nabi, neutanggoeng lon bak yahudi
Meudeh sikin, nibak takue po ma jisie
Bukon sayang, bungoeng mancang mirah mirah
Lon ngieng gata, nyan bandua mantoeng mirah
Nyoe troek rimueng, dalam hutuen soe peusiblah
Ma ka mate, bak uroenyoe khendak Allah
Soe bri makanan, japang anuek duek dengoen grah
Gluh jimarit, leumah leumboet ie mata bobah
Su ot anuek, kamoe dua bek ma gundah
Ma meujanji, deungon nabi neujak peuglah
Keu makanan bek neugundah kamoe lan gle
Ie ie caloek, pat meurumpok sigra minum le
Na ie kubang, hai ma badan bek neupike
Kamoe dua Tuhan peulara, sinoe dalam gle
Oh jideungoe , meunan anuek jimeukalam
Moe meuhob hob, dicoem anuek dua sikarang
Oh lhuen izin, nibak anuek dijak rijang
Mata u likoet jisuroet suroet, anuek jipandang
Glueh jiriwang, rijang rijang nibak nabi
Troek bak taroen, jimasoek droe nibak takue
Glueh pih jimoe, ngoen ie mata laju ile
Ubak nabi, jimeungadu laju sare
Ya habibi ya Muhammad, ya janjongan
Janji ulon dengan gata, ubah jih tan
Sabda nabi, bak yahudi neumeukalam
Glueh ka jiwoe, kalon keudroe ubah jih tan
Di yahudi, bandum sare ka jikalon
Binatang gle, jiriwang le masoek taroen
Di yahudi bandum sare, jimeupakat
Nyoe sibeuna, le mujizat bak Muhammad
Dum yahudi bandum sare jimeu ucap
Biet sibeuna beutoi gata hai Muhammad
Kamoe bandum bak uroenyoe meu iseulam
Meunan yahudi, bandum sare jimeukalam
Gluh jipeulhueh laju rijang le yahudi
Lake izin ubak rasul muhammad nabi
Glueh meu ucap kalimat syahdad pujoe rabbi
Dipeubeuna nabi Muhammad rasul ilahi
Glueh jigrob grob seunang hate galak jih that
Laju jiwoe bak anuek droe laju leugat
Anuek tahe jikalon ma mantoeng sehat
Sira jimoe jimarit meunoe laju leugat
Wahie po ma pakon rijang neuwoe keunoe
Deungan nabi neumeujanji pue ka seuleusoe
Seu ot po ma bak masanyan laju bagah
Hana janji deungon Nabi kareuna Allah
Dum yahudi drop lon bunoe ka iseulam
Ma jipeulhueh lon woe laju rijang rijang
Oh jideungo haba bak ma anuek teuceungang
Nyoe sibeuna Nabi Muhammad Rasul Tuhan
Aneuk beudoeh jijak com ma rijang rijang
Jak mom susu hate rindu that sukaan
Ohnoe habeh riwayat glueh wahe rakan
Kalhueh lon peugah tacoek bagah keu pedoman
Dumnan leubeh, Muhammadnyoe rasul Tuhan
Dum binatang gle deungan Nabi jimeukalam