Lagak dalam blang meureuntang pade
Lagak dalam gle udep bak kayee
Adat meukawen salen laju le
Jino lon rawe keu bhah meulakee
Lam adat Aceh bereh bukon le
Kuta ngon diglee cit hana padee
Teutap geu junjong peutimang sare
Cit hana reule cukup meutentee
Oh ka meukeunong keu inong kase
Yu jak seulangke laju meulakee
Geuba ngon ranub bacut lam bate
Laen lom hase ube nyang peurlee
Bak uroe geujak beulagak kon le
Nyang got geupike uroe meutentee
Geukalon langkah nyang pah tapeuse
Meunan seulangke carong that ulee
Langkah raseuki beumeukri lahe
Peuteumun geupike mawot meuteuntee
Meunan nyang lazem kayem deuh lahe
Kuta ngon digle meunan keuh nyang mee
Karna meukawen baten ngon lahe
Kon hai boh hate meulagee-lagee
Kon pura-pura beuna tapike
Geu take take geu pileh watee
Oh uroe kapah langkah laju le
Teungku seulangke geujak meulakee
Sidro ngon dua ka geujak sare
Nacit boh hate ladom geujak lhee
Uroe geujak nyan pih napham tafeuse
Teungku seulangke ceureudah ulee
Eu dara baro jago bukon le
Peubeut di uke keurija teuntee
Nyo langkah nyang brok oh trok seulangke
Nyan bungong pade di palet gutee
Teungoh sugot ok nyang brok bukon le
Ladom meugule teungeut lam juree
Nyo meunan macam ragam deuh lahe
Teungku seulangke han geujak dilee
Laju geugisa geuputa sare
Baten ngon lahe meukeunong lagee
Dak na gop kalon pakon riwang le
Meuphom geurawe haba han malee
Geukhen salah jak hai pak boh hate
Rumoh nek kande jak mita teubee
Nyo langkah nyang jroh oh trok seulake
Bungong sirungkhe harom mangat bee
Teungoh dimano rah droe bohate
Atoe nyak kande seumbahyang peurlee
(Sumber: buku narit maja MAA Lhokseumawe)